Nou konn wè materyèl sa a nan vizaj moun? Yo rele kask Reyalite vityèl. Eske w konnen nou ka itilize l pou fòme pwodiktè yo? Se pa yon sekrè, fòmasyon se yon aspè kle nan amelyore pwodiksyon agrikòl, Reyalite vityèl ka bay nouvo opòtinite pou yon fòmasyon pi efikas.

Si w ta vle gade videyo a emisyon an pito, suiv lyen sa a: https://youtube.com/@jopierre

Kisa ki reyalite vityèl la?

Reyalite vityèl (VR) se yon similation enfòmatik de yon anviwònman oswa yon eksperyans ki ka sanble oubyen diferan de reyalite ki vrè a. Yo itilize l jeneralman pou ofri itilizatè yo eksperyans kote li santi l antre nan mond l ap gade a pandan li nan kask VR la. Yo itilze VR nan divès domèn, tankou jwèt videyo, edikasyon, medsin, nan fè piblisite ak plis ankò.

Ki pwoblèm fòmasyon agrikiltè yo ap resevwa yo genyen aktyèlman?

Fòmasyon k ap fèt de manyè tradisyonèl pou pwodiktè yo souvan koute chè epi pran tan, sitou si agrikiltè yo oblije deplase byen lwen pou ale nan seminè oswa al suiv kou. Agrikiltè yo ka twouve li difisil tou pou mete konesans yo resevwa yo an pratik akòz konpleksite sistèm agrikilti yo. Pa egzanp, lè kiltivatè yo patisipe nan fòmasyon sou metòd irigasyon, li ka parèt pa fwa difisil pou konprann prensip yo akòz konpleksite sistèm irigasyon ki egziste deja. Ou jis ap blabla nan tèt li, men li pa kenbe anyen… Aaah se fatigan e epuizan!

Ki jan reyalite vityèl ka ede amelyore fòmasyon agrikiltè yo?

Reyalite vityèl ka ede amelyore fòmasyon kiltivatè yo nan pèmèt agrikiltè yo rantre byen fon nan sa y ap aprann lan pandan yo ap mete an pratik konesans yo epi y ap entèraji ak reyalite a atravè kask VR la. Agrikiltè yo ka eksplore senaryo ak anviwònman vityèl la ki reprezante sitiyasyon reyèl yo rankontre nan travay yo, sa ki ka ede yo pi byen konprann prensip ak teknik yo.

Pa egzanp, kiltivatè yo ka patisipe nan yon similation reyalite vityèl ki ede yo konprann diferan metòd irigasyon epi wè efè chwa yo sou sistèm irigasyon an. Sa ka ede yo pran desizyon ki kalkile pou optimize itilizasyon dlo epi amelyore pwodiktivite nan jaden yo.

Sèvi ak reyalite vityèl ka ede nan ekonomize tan ak lajan lè agrikiltè yo evite deplase pou al suiv fòmasyon. Konsa tou, yo ka benefisye de fòmasyon ki pi fleksib ki ka adapte ak lè travay yo epi bezwen endividyèl yo.

Egzanp itilizasyon VR nan fòmasyon agrikiltè.

Gen anpil egzanp deja sou itilizasyon reyalite vityèl nan fòmasyon agrikiltè yo. Gen yon start-up nan sektè agrikòl la ki te devlope yon similation reyalite vityèl pou ede agrikiltè yo konprann diferan aspè nan tretman kilti yo, tankou prevansyon maladi ak ensèk nuizib, seleksyon semans ak planifikasyon sikl kwasans kilti yo. Agrikiltè yo ka eksplore diferan anviwònman vityèl epi fè chwa pou wè ki rezilta jaden yo ap bay, sa ki ede yo konprann diferan faktè ki afekte kwasans kilti yo.

Anplis de sa, kèk pwogram fòmasyon agrikòl sèvi ak reyalite vityèl tou pou ede agrikiltè yo konprann pwosesis yo nan transfòmasyon pwodwi agrikòl yo epi defi yo ka fè fas nan komèsyalizasyon pwodwi sa yo. Agrikiltè yo ka eksplore diferan chèn apwovizyonman epi konprann diferan pwosesis sa enplike, tankou anbalaj ak distribisyon, sa k ap ede yo pran desizyon ki pi reflechi lè yo gen pou yo vann pwodui sa yo.

Reyalite vityèl ka ofri nouvo opòtinite pou fòme agrikiltè yo avèk plis efikasite.  Agrikiltè yo ka benefisye de fòmasyon ki pi fleksib, ki pi efikas ak entèraktif, sa k aa ede yo amelyore pwodiksyon agrikòl yo. Mwen espere espere atik sa a te ba ou yon lide sou enpòtans reyalite vityèl nan agrikilti epi mwen ap ankouraje w aprann plis sou opòtinite fòmasyon pou kiltivatè yo.